Recettes Chez Imane

المقادير :

4 دجاجات كل ماكانو صغار كيكونو ألذ ونحاولو يكونو في نفس الوزن تقريبا + 8 حبات بصل كبيرة + ربيطة متوسطة معدنوس + 1 راس كبير ثوم + م ص سمن حار + م ص قرفة + قرفة عواد + م ص معمراش كامون + م ص إبزار + م ص عامرة سكنجبير + نصف م ص خرقوم + 5 زعفرنات + شوية زعفران شعرة أنا ماعملتوش + م ص ملح + 4 حبات قعقلة أو الهيل + 4 حبات نويويرة + كاس زيت بلدية وكاس زيت رومية + ربع حامضة مصيرة كبيرة

للتدغميرة :

الكبادي د الدجاج + زلافة زيتون اخضر مقطع + حامضة مصيرة

للتزيين :

التمر + عقدة اللوز + اللوز مقلي

الطريقة :

طحنت المعدنوس والثوم وو3 حبات بصل وضفتهم على الزيت والتوابل

خلطت الشرمولة وشرملت بيها الدجاج وثقبتو مزيان باش يتشرب الشرمولة وطبعا دخلتها بين الجلد واللحم وفي كل الفراغات

إدا كان عندنا الوقت كل ما خليناه مرقد يكون أحسن مثلا من الليل للصباح او من الصباح لليل الشرمولة كتساعد باش الدجاج يكون فتي وكيطيب أسرع

هنا عملتو يتشحر شوية من زوج جيهات

منبعد ضفت البصلة لي بقات كاملة وضفت 2 ليتر من الماء وغطيت الطنجرة وخصها تبقى كيف الصورة معرية من وحد الجهة

ملي كان الدجاج كيطيب سلقت الزيتون وقشور الحامضة وحد عشرة دقايق هاد العملية كتقلل من الملوحة ديالهم

وسلقت حتى الكبدة نفس الوقت باش كتحيد منها الزفورية ومنين كنقطعها كتبقا قابطة راسها ومكتفتتش

بعد ما طاب الدجاج حيدتو من الطنجرة وخليتو ينشف ويبرد

وضفت الكبدة بعد ما قطعتها والحامض والزيتون للمرق وخليتو يختر ويعقاد

قليت الدجاج في حمام زيت وضفت فالزيت م ص سمن حار كيعطي ريحة مزيونة فالدجاج ومكيجيش باين الطعم ديالو

زينت بالتمر واللوز

بالصحة والراحة

المقادير :

500 غ دقيق الفورص لي كنعجبنو بيه الخبز ماشي د الحلويات + 200 غ حليب دافئ + 60 غ سكر + 2 بيضات + 50 غ زبدة لينة + 25 غ خميرة فورية + 5 غ ملح

الطريقة :

نخلط النواشف ثم نضيف البيض والزبدة ووشوية د الحليب ونخلط مزيان ونبدا نجمع العجينة وانا كنضيف حتى نسالي الكمية كلها

العجينة فالأول كتكون كتلصق نرش الطابلة بشوية د الدقيق ونبدا نجمع العجين ونعجنو وحد 10 دقايق حتى نحصل على عجين ليين

نعمل منو كورة ونزلو في إناء مغطي ونخليه يخمر ساعة أو ملي نشوفو نتضاعف

بعد ما دازت ساعة وتضاعف الحجم كيف كتشوفو في الصورة رقم 2 هزيت العجين وخويتو من الهوا ورجعت شكلت منو كرة مرة اخرى ورجعتو للإناء وغطيتو يخمر مرة أخرى تقريبا ساعة

غادي تلاحضو أنه فالمرة التانية كيتضاعف الحجم أكثر من المرة الأولى